Hum Ne Kis Din Tere Kooche Mein Guzara Na Kiya

Hum ne kis din tere kooche mein guzara na kiya,
Tu ne ai shokh magar kaam humara na kiya..

Ek hi baar huin wajah-e-giraftaari-e-dil,
Iltifat un ki nigaahon ne dobara na kiya..

Mahfil-e-yaar ki rah jaayegi aadhi raunaq,
Naaz ko us ne agar anjuman-aara na kiya..

Ta'an-e-ahbaab sune sarzanish-e-khalq sahi,
Hum ne kya kya teri khaatir se gawara na kiya..

Jab diya tum ne raqeebon ko diya jaam-e-sharaab,
Bhool kar bhi meri jaanib ko ishaara na kiya..

Ru-ba-ru chashm-e-tasawwur ke wo har waqt rahe,
Na sahi aankh ne gar un ka nazara na kiya..

Gar yahi hai sitam-e-yaar to hum ne 'Hasrat',
Na kiya kuchh bhi jo duniya se kinara na kiya.!!

"Hasrat Mohani"
__________

Iltifaat = kindness/ attention,
Ta'an-e-ahbaab = taunts of friends,
Sarzanish-e-khalq = punishment of created beings,