Hum Kahaan Aur Tum Kahaan Jaanaa

Hum kahaan aur tum kahaan jaanaa,
Hain kayi hijr darmiyaan jaanaa..

Rayegaa'n wasl mein bhi waqt hua,
Par hua khoob rayegaa'n jaanaa..

Mere andar hi to kahin gum hai,
Kis se puchhun tera nishaan jaanaa..

Aalam-e-be-karaa'n-e-rang hai tu,
Tujh mein thehrun kahaan kahaan jaanaa..

Main hawaon se kaise pesh aaun,
Yahi mausam hai kya wahaan jaanaa..

Raushni bhar gayi nigaaho'n mein,
Ho gaye khwab be-amaa'n jaanaa..

Dard-mandaan-e-ku-e-dildaari,
Gaye ghaarat jahaan tahaan jaanaa..

Ab bhi jheelo'n mein aks padte hain,
Ab bhi neela hai aasman jaanaa..

Hai jo purkho'n tumhaara aks-e-khyaal,
Zakhm aaye kahaan kahaan jaanaa.!!

"Jaun Eliya"