Din Ki Bedard Thakan Chehre Pe Le Kar Mat Ja

Din ki bedard thakan chehre pe le kar mat ja,
Baam-o-dar jaag rahe honge abhi ghar mat ja..

Mere purkhon ki wirasat ka bharam rahne de,
Tu haweli ko khula dekh ke andar mat ja..

Boond bhar dard sambhalta nahin kam-zarfon se,
Rakh ke tu apni hatheli pe samandar mat ja..

Phootne de meri palkon se zara aur lahu,
Ai meri neend abhi chhorh ke bistar mat ja..

Kuchh to rahne de abhi tark-e-wafa ki khaatir,
Tujh ko jaana hai to ja haath jhatak kar mat ja..

Aur kuchh der ye mashq-e-nigah-e-naaz sahi,
Samne baith abhi phenk ke khanjar mat ja..

Dhoop kya hai tujhe andaaza nahin hai 'Qaisar',
Aable paanw mein pad jayenge baahar mat ja.!!

"Qaisar-ul-jafri"
__________

Kam-zarf = narrow, less capacity,
Mashq-e-nigah-e-naaz = Practice.;rehearsal of coquettish glance,