Daanish-waro'n ke bas mein ye radd-e-amal na tha,
Main aisi tegh le ke utha jis mein phal na tha..
Kya dard toot toot ke barsa hai raat bhar,
Itna ghubaar to mere chehre pe kal na tha..
Pathraaw kar raha hai wo khud apni zaat par,
Kya dil ke mas'ale ka koi aur hal na tha..
Shaakhein ladi hui thin to patthar na tha naseeb,
Patthar pade mile to darakhton mein phal na tha..
Shab ki hawa se haar gayi mere dil ki aag,
Yakh-basta shahr mein koi radd-o-badal na tha..
Ab ek ek harf se chhanti hai raushni,
Tum se mile na the to ye husn-e-ghazal na tha..
'Qaisar'! zameer-e-waqt ko dekha kured ke,
Sadiyaan rakhi thin dosh pe mutthi mein pal na tha.!!
"Qaisar-ul-jafri"
__________
Daanish-waro'n = intellectuals/ scholars,
Radd-e-amal = Reaction,
Yakh-basta = frozen,
No comments:
Post a Comment