Baahar Guzaar Di Kabhi Andar Bhi Aayenge

Baahar guzaar di kabhi andar bhi aayenge,
Hum se ye poochhna kabhi hum ghar bhi aayenge..

Khud aahani nahin ho to poshish ho aahani,
Yoon shisha hi rahoge to patthar bhi aayenge..

Ye dasht-e-be-taraf hai gumaano'n ka mauj-khez,
Is mein saraab kya ke samandar bhi aayenge..

Aashuftagi ki fasl ka aaghaaz hai abhi,
Aashuftagan palat ke abhi ghar bhi aayenge..

Dekhein to chal ke yaar tilismaat-e-samt-e-dil,
Marna bhi pad gaya to chalo mar bhi aayenge..

Ye shakhs aaj kuchh nahin par kal ye dekhiyo,
Us ki taraf qadam hi nahin sar bhi aayenge.!!

"Jaun Eliya"
__________

Aahani = made of iron, strong, hard,
Poshish = dress,
Dast-e-be-taraf = directionless desert,
Mauj-khez = creating waves, ripples,
Saraab = mirage/ illusion,
Aashuftagi = distress/ affliction,
Aashuftagan = distressed/ afflicted people,
Tilismaat-e-samt-e-dil = magic of direction of heart,