Bada Ahsaan Hum Farma Rahe Hain

Bada ahsaan hum farma rahe hain,
Ke un ke khat unhein lauta rahe hain..

Nahin tark-e-mohabbat par wo raazi,
Qayamat hai ke hum samjha rahe hain..

Yaqeen ka raasta tay karne waale,
Bahut tezi se waapas aa rahe hain..

Ye mat bhoolo ke ye lamhaat hum ko,
Bichhadne ke liye milwa rahe hain..

Ta'ajjub hai ki ishq-o-aashiqi se,
Abhi kuchh log dhokha kha rahe hain.. 

Tumhein chaahenge jab chhin jaogi tum, 
Abhi hum tum ko arzaa'n pa rahe hain..

Kisi surat unhein nafrat ho hum se,
Hum apne aib khud ginwa rahe hain..

Wo paagal mast hai apni wafa mein,
Meri aankhon mein aansu aa rahe hain.. 

Daleelo'n se use qaail kiya tha,
Daleelein de ke ab pachhta rahe hain..

Teri baanhon se hijrat karne waale,
Naye maahaul mein ghabra rahe hain..

Ye jazb-e-ishq hai ya jazba-e-raham,
Tere aansu mujhe rulwa rahe hain..

Ajab kuchh rabt hai tum se ke tum ko,
Hum apna jaan kar thukra rahe hain..

Wafa ki yaadgaaren tak na hongi,
Meri jaan bas koi din ja rahe hain.!!

"Jaun Eliya"
__________

Arzaa'n = of lesser value, cheap,