Aur Bhi Ho Gaye Begana Wo Ghaflat Kar Ke

Aur bhi ho gaye begana wo ghaflat kar ke,
Aazmaya jo unhein zabt-e-mohabbat kar ke..

Dil ne chhoda hai na chhode tere milne ka khyaal,
Baar-ha dekh liya hum ne malaamat kar ke..

Dekhne aaye the wo apni mohabbat ka asar,
Kahne ko ye hai ke aaye hain ayaadat kar ke..

Pasti-e-hausla-e-shauq ki ab hai ye salaah,
Baith rahiye ghum-e-hijraa'n pe qana'at kar ke..

Dil ne paaya hai mohabbat ka ye aali rutba,
Aap ke dard-e-dawa-kaar ki khidmat kar ke..

Rooh ne paai hai takleef-e-judaai se najaat,
Aap ki yaad ko sarmaya-e-raahat kar ke..

Chhed se ab wo ye kahte hain ke sambhlo 'Hasrat',
Sabr o taab-e-dil-e-bimaar ko ghaarat kar ke.!!

"Hasrat Mohani"
__________

Qana'at = contentment,
Dard-e-dawa-kaar = medicinal pain,
Taab-e-dil-e-bimaar = tolerance, capacity for sick heart,
Ghaarat = plunder, ravage, pillage, calamity,