Aql Se Haasil Hui Kya Kya Pashimaani Mujhe

Aql se haasil hui kya kya pashimaani mujhe,
Ishq jab dene laga taalim-e-nadaani mujhe..

Ranj degi baagh-e-rizwaan ki tan-aasaani mujhe,
Yaad aayega tera lutf-e-sitam-raani mujhe..

Meri jaanib hai mukhatib khaas kar wo chashm-e-naaz,
Ab to karni hi padegi dil ki qurbaani mujhe..

Dekh le ab kahin aa kar jo wo ghaflat-shiaar,
Kis qadar ho jaaye mar jaane mein aasaani mujhe..

Be-naqaab aane ko hain maqtal mein wo be-shak magar,
Dekhne kaahe ko degi meri hairaani mujhe..

Sainkadon aazadiyan is qaid par 'Hasrat' nisaar,
Jis ke baais kahte hain sab un ka zindaani mujhe.!!

"Hasrat Mohani"
__________

Baagh-e-rizwaan = garden of paradise,
Tan-aasaani = bodily ease, indulgence,
Lutf-e-sitam-raani = pleasure of tyranny,
Ghaflat-shiaar = neglectful/ inattentive,