Aap Ne Qadr Kuchh Na Ki Dil Ki

Aap ne qadr kuchh na ki dil ki,
Ud gayi muft mein hansi dil ki..

Khu hai az-bas ke aashiqi dil ki,
Ghum se wabasta hai khushi dil ki..

Yaad har haal mein rahe wo mujhe,
Al-gharaz baat rah gayi dil ki..

Mil chuki hum ko un se daad-e-wafa,
Jo nahin jaante lagi dil ki..

Chain se mahw-e-khwab-e-naaz mein wo,
Bekali hum ne dekh li dil ki..

Hama-tan sarf-e-hoshyaari-e-ishq,
Kuchh ajab shay hai be-khudi dil ki..

Un se kuchh to mila wo ghum hi sahi,
Aabru kuchh to rah gayi dil ki..

Mar mite hum na ho saki poori,
Aarzu tum se ek bhi dil ki..

Wo jo bigde raqeeb se 'Hasrat',
Aur bhi baat ban gayi dil ki.!!

"Hasrat Mohani"
__________

Khu = habit, custom, disposition, behaviour,
Az-bas = extremely necessary, sufficiently,
Al-gharaz = Meaning That, in short, briefly,
Mahram-e-khwab-e-naaz = engaged in dreams of beloved,
Hama-tan = wholly, entirely,
Sarf-e-hoshyaari-e-ishq = employing all the skills in love,