Zameen Hogi Kisi Qaatil Ka Daamaa'n Hum Na Kahte The

Zameen hogi kisi qaatil ka daamaa'n hum na kahte the,
Akaarat jayega khoon-e-shaheedaa'n hum na kahte the,

Ilaaj-e-chaak-e-pairahan hua to is tarah hoga,
Siya jayega kaanton se garebaa'n hum na kahte the,

Taraane kuchh diye lafzon mein khud ko qaid kar lenge,
Ajab andaaz se phailega zindaa'n hum na kahte the,

Koi itna na hoga laash bhi le ja ke dafna de,
Inhin sadkon pe mar jayega insaa'n hum na kahte the,

Nazar lipti hai shoalon mein lahu tapta hai aankhon mein,
Utha hi chahta hai koi tufaa'n hum na kahte the,

Chhalakte jaam mein bheegi hui aankhein utar aayin,
Satayegi kisi din yaad-e-yaraa'n hum na kahte the,

Nayi tahzeeb kaise lucknow ko raas aayegi,
Ujad jayega ye shahar-e-ghazalaa'n hum na kahte the..!!

"Jaan Nisaar Akhtar"
__________

Daamaa'n = skirt, hem, foot of a mountain,
Akaarat = Unavailing, In Vain,
Zindaa'n = prison/ gaol/ jail,
Shahr-e-ghazaala'n = city of deer, beautiful girls with eyes like deer,