Wo log hi har daur mein mahboob rahe hain,
Jo ishq mein taalib nahin matloob rahe hain...
Tufaan ki aawaz to aati nahin lekin,
Lagta hai safeene se kahin doob rahe hain...
Un ko na pukaro ghum-e-dauraan ke laqab se,
Jo dard kisi naam se mansoob rahe hain...
Hum bhi teri surat ke parastaar hain lekin,
Kuchh aur bhi chehre humein marghoob rahe hain...
Alfaaz mein izhaar-e-mohabbat ke tareeqe,
Khud ishq ki nazron mein bhi ma'ayoob rahe hain...
Is ahd-e-basirat mein bhi naqqaad humare,
Har ek bade naam se mar'oob rahe hain...
Itna bhi na ghabraao nayi tarz-e-ada se,
Har daur mein badle hue usloob rahe hain.!!
"Jaan Nisaar Akhtar"
__________
Matloob = desired, longed for, demanded, required,
Mansoob = appointed, nominated, fixed, related to manifestation,
Marghoob = pleasant, agreeable, favourite,
Ma'ayoob = indecent, bad, infamous, improper, unseemly,
Ahd-e-basirat = age of perceptiveness,
Naqqaad = a critic, a reviewer,
Mar'oob = impressed,
Usloob = way, style, manner, method,
No comments:
Post a Comment