Ye Kya Haalat Bana Rakkhi Hai Ye Aasaar Kaise Hain

Ye kya haalat bana rakkhi hai ye aasaar kaise hain,
Bahut achchha-bhala chhorha tha ab beemar kaise Hain,

Wo mujh se poochhne aai hai kuchh likkha nahin mujh par,
Main us ko kaise samjhaun mere ash'aar kaise hain,

Meri sochein hain kaisi kaun in sochon ka markaz hai,
Jo mere zehn mein palte hain wo afkaar kaise hain,

Mere dil ka alaaw aaj tak dekha nahin jis ne,
Wo kya jaane ki shoale surat-e-izhaar kaise hain,

Ye mantiq kaun samjhega ke yakh-kamre ki thandak mein,
Mere alfaaz ke malboos shoala-baar kaise hain,

Zara si ek farmaaish bhi poori kar nahin sakte,
Mohabbat karne waale log bhi lachaar kaise hain,

Judaai kis tarah bartaaw hum logon se karti hai,
Mizaajan ham-sukhnawar be-dil-o-be-zaar kaise hain.!!

"Aitebaar Sajid"
___
Afkaar = thoughts, worries,
Mantiq = logic, reasoning,
Shoala-baar = raining fire or flame,