Ye haseen log hain tu in ki murawwat pe na ja,
Khud hi uth baith kisi izn o ijazat pe na ja,
Surat-e-shama tere saamne raushan hain jo phool,
Un ki kirno'n mein naha zauq-e-sama'at pe na ja,
Dil si check-book hai tere paas tujhe kya dhadka,
Ji ko bha jaaye to phir cheez ki qeemat pe na ja,
Itna kam-zarf na ban us ke bhi seene mein hai dil,
Us ka ahsaas bhi rakh apni hi raahat pe na ja,
Dekhta kya hai thehar kar meri jaanib har roz,
Rauzan-e-dar hun meri deed ki hairat pe na ja,
Tere dil-sokhta baithe hain sar-e-baam abhi,
Baal khole hue taaro'n bhari is chhat pe na ja,
Meri poshaak to pahchan nahin hai meri,
Dil mein bhi jhaank meri zaahiri haalat pe na ja.!!
"Aitebaar Sajid"
No comments:
Post a Comment