Ye theek hai ke bahut wahshatein bhi theek nahin,
Magar humari zara aadatein bhi theek nahin,
Agar milo to khule dil ke saath hum se milo,
Ke rasmi rasmi si ye chahatein bhi theek nahin,
Taalluqaat mein gahraiyan to achchhi hain,
Kisi se itni magar qurbatein bhi theek nahin,
Dil o dimagh se ghayal hain tere hijr-naseeb,
Shikasta dar bhi hain, un ki chhaten bhi theek nahin,
Qalam utha ke chalo haal-e-dil hi likh daalo,
Ke raat din ki bahut furqatein bhi theek nahin,
Tum "Aitebaar" pareshan bhi in dino'n ho bahut,
Dikhaai padta hai kuchh sohbatein bhi theek nahin.!!
"Aitebaar Sajid"
No comments:
Post a Comment