Yaqeen Hai Ke Gumaan Hai Mujhe Nahin Maloom

Yaqeen hai ke gumaan hai mujhe nahin maloom,
Ye aag hai ke dhuaan hai mujhe nahin maloom..

Ye har taraf hai koi mahfil-e-tarab barpa,
Ke bazm-e-ghum-e-zadagaa'n hai mujhe nahin maloom..

Liye to phirta hun ek mausam-e-wajood ko main,
Bahaar hai ke khizaa'n hai mujhe nahin maloom..

Wo rang-e-gul to usi khaak mein ghula tha kahin,
Magar mahak wo kahaan hai mujhe nahin maloom..

Khabar to hai ke yahin qarya-e-malaal bhi hai,
Ye kaun mahw-e-fughaa'n hai mujhe nahin maloom..

Main tujh se door usi dasht-e-na-rasi mein hun gum,
Idhar tu nauha-kunaa'n hai mujhe nahin maloom..

Ye daagh-e-ishq jo mit ta bhi hai chamakta bhi hai, 
Ye zakhm hai ke nishaan hai mujhe nahin maloom..

Guzarta jaata hun ek arsa-e-gurez se main,
Ye la-makaan ke makaan hai mujhe nahin maloom..

Rawaa'n-dawaa'n to hai ye ju-e-zindagi har dam,
Magar kidhar ko rawaa'n hai mujhe nahin maloom..

Ye kashmakash jo man-o-tu ke darmiyaan hai so hai,
Miyaan-e-sood-o-ziyaa'n hai mujhe nahin maloom..

Ye ku-e-khaak hai ya phir dayaar-e-khwab koi,
Zameen hai ke zamaa'n hai mujhe nahin maloom..

Yahin kahin pe wo khush-ru tha aaj se pahle,
Magar wo aaj kahaan hai mujhe nahin maloom.!!

"Abrar Ahmad"
__________

Mahfil-e-tarab = assembly of ecstasy,
Bazm-e-ghum-e-zadagaa'n = assembly of aggrieved,
Mausam-e-wajood = season of existence,
Qarya-e-malaal = region of regret,
Mahw-e-fughaa'n = busy in grief,
Dasht-e-na-rasi = desert of inaccesibility,
Nauha-kunaa'n = grieving, mourning,
Arsa-e-gurez = period of being evasive,
Ju-e-zindagi = stream-let, spring of life,
Man-o-tu = me and you,
Miyaan-e-sood-o-ziyaa'n = between loss and profit,
Zamaa'n = time, tense (grammatical),
Khush-ru = having a beautiful or charming face,