Daagh-e-dil Hum Ko Yaad Aane Lage

Daagh-e-dil hum ko yaad aane lage,
Log apne diye jalaane lage..

Kuch na pa kar bhi mutmaeen hain hum,
Ishq mein haath kya khazaane lage..

Yahi rasta hai ab yahi manzil,
Ab yahin dil kisi bahaane lage..

Khud-farebi si khud-farebi hai,
Paas ke dhhol bhi suhaane lage..

Ab to hota hai har qadam pe gumaan,
Hum ye kaisa qadam uthaane lage..

Is badalte hue zamaane mein,
Tere qisse bhi kuchh puraane lage..

Rukh badalne laga fasaane ka,
Log mahfil se uth ke jaane lage..

Ek pal mein wahaan se hum utthe,
Baithne mein jahaan zamaane lage..

Apni qismat se hai mafar kis ko,
Teer par ud ke bhi nishaane lage..

Hum tak aaye na aaye mausam-e-gul,
Kuch parinde to chahchahane lage..

Shaam ka waqt ho gaya 'Baqi',
Bastiyon se sharaar aane lage.!!

"Baqi Siddiqui"
__________

Mafar = escape/ run away,