Use Mana Kar Ghuroor Us Ka Badha Na Dena

Use mana kar ghuroor us ka badha na dena,
Wo saamne aaye bhi to us ko sada na dena,

Khuloos ko jo khushamadon mein shumaar kar lein,
Tum aise logon ko tohfatan bhi wafa na dena,

Wo jis ki thokar mein ho sambhalne ka dars shaamil,
Tum aise patthar ko raaste se hata na dena,

Saza gunaahon ki dena us ko zaroor lekin,
Wo aadmi hai tum us ki azmat ghata na dena,

Jahaan rafaqat ho fitna-pardaaz maulwi ki,
Bahisht aisi kisi ko mere khuda na dena,

'Qateel' mujh ko yahi sikhaya mere nabi ne,
Ke fatah pa kar bhi dushmanon ko saza na dena.!!

"Qateel Shifai"
___
Fitna-pardaaz = maker of mischiefs,