Udaas Shaam Ki Ek Nazm

* Nazm *
__________

Wisaal-rut ki
Ye pahli dastak hi sarzanish hai,

Ke hijr-mausam ne raste raste
Safar ka aaghaaz kar diya hai,

Tumhaare haathon ka lams jab bhi
Meri wafa ki hatheliyon par hina banega,

To soch lungi...

Rafaqaton ka sunahra suraj
Ghuroob ke imtihaan mein hai,

Humare baaghon se gar kabhi
Titliyon ki khushbu guzar na paaye to ye na kahna, 

Ke titliyon ne gulaab-raste badal liye hain, 

Agar koi shaam yun bhi aaye
Ke jis mein hum tum lagein paraaye,

To jaan lena,

Ke shaam be-bas thi shab ki tarikiyon ke haathon,

Tumhaari khwahish ki mutthiyan
Be-dhiyaniyon mein kabhi khulein to yaqeen karna,

Ke meri chahat ke jugnuon ne,

Tumhaare haathon ke lams-e-taaza ki khwahishon mein,

Bade ghanere andhere kaate,

Magar ye khadshe,
Ye waswase to takallufan hain,

Jo be-irada safar pe niklein,
To ye to hota hai ye to hoga,

Hum apne jazbon ko munjamid rayeganiyon ke supurd kar ke,

Ye soch lenge,

Ke hijr-mausam to wasl ki pahli shaam se hi,
Safar ka aaghaaz kar chuka tha.!!

"Noshi Gilani"
_____

Sarzanish = reproof/reprehension/rebuke/chiding,
Munjamid = frozen, congealed, solid,