Tum Kab The Qareeb Itne Main Kab Door Raha Hun

Tum kab the qareeb itne main kab door raha hun,

Chhodo na karo baat ke main tum se khafa hun..

Rahne do ke ab tum bhi mujhe padh na sakoge,

Barsaat mein kaaghaz ki tarah bheeg gaya hun..

Sau baar girah de ke kisi aas ne joda,

Sau baar main dhaage ki tarah toot chuka hun..

Jaayega jahaan tu meri aawaz sunega,

Main chor ke manind tere dil mein chhupa hun..

Ek nuqte pe aa kar bhi hum-aahang nahin hain,

Tu apna fasana hai to main apni sada hun..

Chhedo na abhi shaakh-e-shikasta ka fasana,

Thehro main abhi raqs-e-saba dekh raha hun..

Manzil ka pata jis ne diya tha mujhe 'Baqi',

Us shakhs se raste mein kayi baar mila hun..!!

"Baqi Siddiqui"
__________

Hum-aahang = harmonious, concordant, of the same tone or voice, agreeing,