Un Ka Ya Apna Tamasha Dekho

Un ka ya apna tamasha dekho,
Jo dikhata hai zamana dekho..

Waqt ke paas hain kuchh tasveeren, 
Koi dooba hai ke ubhra dekho..

Rang saahil ka nikhar aayega,
Do ghadi jaanib-e-dariya dekho..

Tilmila uttha ghana sannata,
Phir koi neend se chaunka dekho..

Hum-safar ghair hue jaate hain,
Faasla rah gaya kitna dekho..

Barf ho jaata hai sadiyon ka lahu,
Ek thehra hua lamha dekho..

Rang udte hain tabassum ki tarah,
Aaina-khano'n ka daawa dekho..

Dil ki bigdi hui surat hai yahaan,
Ab koi aur kharaba dekho..

Ya kisi parde mein gum ho jao,
Ya utha kar koi parda dekho..

Dosti khoon-e-jigar chahti hai,
Kaam mushkil hai to rasta dekho..

Saada kaghaz ki tarah dil chup hai,
Haasil-e-rang-e-tamanna dekho..

Yahi taskeen ki surat hai to phir,
Chaar din ghum ko bhi apna dekho..

Ghum-gusaron ka sahaara kab tak,
Khud pe bhi kar ke bharosa dekho..

Apni niyat pe na jao 'Baqi',
Rukh zamane ki hawa ka dekho.!!

"Baqi Siddiqui"