Tan-e-tanha Muqaabil Ho Raha Hun Main Hazaaron Se

Tan-e-tanha muqaabil ho raha hun main hazaaron se,
Haseenon se raqeebon se ghumon se gham-gusaaron se,

Unhein main chheen kar laya hun kitne daawedaron se,
Shafaq se chaandni raaton se phoilon se sitaaron se,

Sune koi to ab bhi raushni aawaaz deti hai,
Pahadon se guphaon se bayabanon se ghaaron se,

Humare dagh-e-dil zakhm-e-jigar kuchh milte-julte hain,
Gulon se gul-rukhon se mah-washon se mah-paaron se,

Kabhi hota nahin mahsoos wo yun qatl karte hain,
Nigaahon se kanakhiyon se adaon se ishaaron se,

Hamesha ek pyasi rooh ki aawaz aati hai,
Kuon se panghaton se naddiyon se aabshaaron se,

Ba aaye par na aaye wo unhein kya kya khabar bheji,
Lifaafon se khaton se dukh bhare parchon se taaron se,

Zamane mein kabhi bhi qismatein badla nahin kartin,
Ummidon se bharoson se dilaason se sahaaron se,

Wo din bhi haye kya din the jab apna bhi taalluq tha,
Dashahre se diwali se basanton se bahaaron se,

Kabhi patthar ke dil ai 'Kaif' pighle hain na pighlenge,
Munajaaton se fariyaadon se cheekhon se pukaaron se.!!

"Kaif Bhopali"
_____
Munajaaton = prayers,