Sitaron Ke Aage Jo Aabaadiyan Hain

Sitaron ke aage jo aabaadiyan hain,
Teri zulf ki gum-shuda waadiyan hain..

Zamana bhi kya raunaqon ki jagah hai,
Kahin rona-dhona kahin shaadiyan hain..

Teri kaakulein hi nahin sabz pariyan,
Meri aarzuein bhi shahzadiyan hain..

Badi shay hai wabastagi do dilon ki,
Ye pabandiyan hi to aazadiyan hain..

Jahaan qadr hai kuchh na kuchh aadmi ki,
Wo kya qaabil-e-qadr aabaadiyan hain..

Yakayak na dil phenkna aankh waalo,
Ye sab aankh ki fitna-ijaadiyan hain..

Ghareebon se kya kaam asaaishon ka,
Wo oonche gharanon ki shahzadiyan hain..

'Adam' sooraton ki chamak par na jaana,
Ye sab aankh ki fitna-ijaadiyan hain..

Jahaan bhi 'Adam' koi dilbar makeen hai,
Wahaan kitni gunjaan aabaadiyan hain.!!

"Abdul Hameed Adam"

ستاروں کے آگے جو آبادیاں ہیں
تری زلف کی گم شدہ وادیاں ہیں

زمانہ بھی کیا رونقوں کی جگہ ہے
کہیں رونا دھونا کہیں شادیاں ہیں

تری کاکلیں ہی نہیں سبز پریاں
مری آرزوئیں بھی شہزادیاں ہیں

بڑی شے ہے وابستگی دو دلوں کی
یہ پابندیاں ہی تو آزادیاں ہیں

جہاں قدر ہے کچھ نہ کچھ آدمی کی
وہ کیا قابل قدر آبادیاں ہیں

یکایک نہ دل پھینکنا آنکھ والو
یہ سب آنکھ کی فتنہ ایجادیاں ہیں

غریبوں سے کیا کام آسائشوں کا
وہ اونچے گھرانوں کی شہزادیاں ہیں

عدمؔ صورتوں کی چمک پر نہ جانا
یہ سب آنکھ کی فتنہ ایجادیاں ہیں

جہاں بھی عدمؔ کوئی دلبر مکیں ہے
وہاں کتنی گنجان آبادیاں ہیں...