Sabhi Andaaz-e-husn Pyaare Hain

Sabhi andaaz-e-husn pyaare hain,
Hum magar saadgi ke maare hain,

Us ki raaton ka intiqaam na poochh,
Jis ne hans hans ke din guzaare hain,

Ai sahaaron ki zindagi waalo,
Kitne insaan be-sahaare hain,

Laala-o-gul se tujh ko kya nisbat,
Na-mukammal se istiaare hain,

Hum to ab doob kar hi ubhrenge,
Wo rahein shaad jo kinaare hain,

Shab-e-furqat bhi jagmaga utthi,
Ashk-e-ghum hain ki mah-paare hain,

Aatish-e-ishq wo jahannam hai,
Jis mein firdaus ke nazaare hain,

Wo humin hain ke jin ke haathon ne,
Gesu-e-zindagi sanwaare hain,

Husn ki be-niyaziyon pe na ja,
Be-ishaare bhi kuchh ishaare hain.!!

"Jigar Muradabadi"
___
Laala-o-gul = tulip and flowers,
Istiaare = metaphors,
Mah-paare = beautiful, pulchritudinous,
Be-niyaziyon = self-contained, free from want,