Tujhi Se Ibtida Hai Tu Hi Ek Din Intiha Hoga

Tujhi se ibtida hai tu hi ek din intiha hoga,
Sada-e-saaz hogi aur na saaz-e-be-sada hoga,

Humein maaloom hai hum se suno mahshar mein kya hoga,
Sab us ko dekhte honge wo hum ko dekhta hoga,

Sar-e-mahshar hum aise aasiyon ka aur kya hoga,
Dar-e-jannat na vaa hoga dar-e-rahmat to vaa hoga,

Jahannam ho ke jannat jo bhi hoga faisla hoga,
Ye kya kam hai humara aur un ka saamna hoga,

Azal ho ya abad donon aseer-e-zulf-e-hazrat hain,
Jidhar nazrein uthaoge yahi ek silsila hoga,

Ye nisbat ishq ki be-rang laaye rah nahin sakti,
Jo mahboob-e-khuda ka hai wo mahboob-e-khuda hoga,

Isi ummeed par hum talibaan-e-dard jeete hain,
Khosha dard de ke tera aur dard-e-la-dawa hoga,

Nigaah-e-qahr par bhi jaan-o-dil sab khoye baitha hai,
Nigaah-e-mehr aashiq par agar hogi to kya hoga,

Siyana bhej dega hum ko mahshar se jahannam mein,
Magar jo dil pe guzregi wo dil hi jaanta hoga,

Samajhta kya hai tu deewangaan-e-ishq ko zaahid,
Ye ho jayenge jis jaanib usi jaanib khuda hoga,

'Jigar' ka haath hoga hashr mein aur daaman-e-hazrat,
Shikayat ho ki shikwa jo bhi hoga barmala hoga..!!

"Jigar Muradabadi"