Palkon Ki Dahleez Pe Chamka Ek Sitara Tha

Palkon ki dahleez pe chamka ek sitara tha,
Saahil ki is bheed mein jaane kaun humara tha,

Kohsaaron ki goonj ki surat phail gaya hai wo,
Main ne apne-aap mein chhup kar jise pukara tha,

Sar se guzarti har ek mauj ko aise dekhte hain,
Jaise is girdaab-e-fana mein yahi sahaara tha,

Hijr ki shab wo neeli aankhein aur bhi neeli thin,
Jaise us ne apne sar se bojh utaara tha,

Jis ki jhilmilta mein tum ne mujh ko qatl kiya,
Patjhad ki us raat wo sab se raushan taara tha,

Tark-e-wafa ke baad mila to jab maloom hua,
Is mein kitne rang the us ke kaun humara tha,

Kaun kahaan par jhootha nikla kya batlaate hum,
Duniya ki tafreeh thi is mein humein khasara tha,

Jo manzil bhi raah mein aai dil ka bojh bani,
Wo us ki taabeer na thi jo khwaab humara tha,

Ye kaisi aawaaz hai jis ki zinda goonj hun main,
Subah-e-azal mein kis ne 'Amjad' mujhe pukara tha.!!

"Amjad Islam Amjad"
___
Girdaab-e-fana = vortex of mortality,