Nazar Mila Ke Mere Paas Aa Ke Loot Liya

Nazar mila ke mere paas aa ke loot liya,
Nazar hati thi ke phir muskura ke loot liya,

Shikast-e-husn ka jalwa dikha ke loot liya,
Nigaah neechi kiye sar jhuka ke loot liya,

Duhaai hai mere Allah ki duhaai hai,
Kisi ne mujh se bhi mujh ko chhupa ke loot liya,

Salaam us pe ke jis ne utha ke parda-e-dil,
Mujhi mein rah ke mujhi mein sama ke loot liya,

Unhin ke dil se koi us ki azmatein poochhe,
Wo ek dil jise sab kuchh luta ke loot liya,

Yahaan to khud teri hasti hai ishq ko darkaar,
Wo aur honge jinhein muskura ke loot liya,

Khusha wo jaan jise di gaui amaanat-e-ishq,
Rahe wo dil jise apna bana ke loot liya,

Nigaah daal di jis par haseen aankhon ne,
Use bhi husn-e-mujassam bana ke loot liya,

Bade wo aaye dil o jaan ke lootne waale,
Nazar se chhed diya gudguda ke loot liya,

Raha kharaab-e-mohabbat hi wo jise tu ne,
Khud apna dard-e-mohabbat dikha ke loot liya,

Koi ye loot to dekhe ke us ne jab chaha,
Tamaam hasti-e-dil ko jaga ke loot liya,

Karishma-saazi-e-husn-e-azal are tauba,
Mera hi aaina mujh ko dikha ke loot liya,

Na lut te hum magar un mast ankhdiyon ne 'Jigar',
Nazar bachaate hue dabdaba ke loot liya.!!

"Jigar Muradabadi"