Na Dekha Rukh Be-naqaab-e-mohabbat

Na dekha rukh be-naqaab-e-mohabbat,
Mohabbat hai shayad hijaab-e-mohabbat,

Barasta hai kaif-e-shabaab-e-mohabbat,
Har aansu hai jaam-e-sharaab-e-mohabbat,

Ajab josh par hai shabaab-e-mohabbat,
Mohabbat hai mast-e-sharaab-e-mohabbat,

Zahe khwaab o tabeer khwaab-e-mohabbat,
Mohabbat hi nikli jawaab-e-mohabbat,

Mujhe kya padi hai tere dar se utthun,
Theharne jo de iztiraab-e-mohabbat,

Dil-e-zarra zarra hai toor-e-tajalli,
Zahe jalwa-e-aftaab-e-mohabbat,

Sabhi uth gaye deeda o dil se parde,
Na uttha magar ek hijaab-e-mohabbat,

Na rakkho gharaz hum se itna hi kah do,
Halaak-e-tabassum kharaab-e-mohabbat,

Lahu ki har ek boond dil ban gayi hai,
Khusha lazzat-e-kaamyab-e-mohabbat,

Hudood-e-mohabbat se bhi badh gaye hum,
Salaamat rahe iztiraab-e-mohabbat..!!

"Jigar Muradabadi"