Nazar Ki Fatah Kabhi Qalb Ki Shikast Lage

Nazar ki fatah kabhi qalb ki shikast lage,
Meri hayat paraye ka band-o-bast lage,

Na wo nuqush na husn-e-kashish ki baat rahi,
sanam-farosh bhi jaise khuda-parast lage,

Abhi mila tha abhi phir bichhad gaya koi,
Ye haadsa bhi hikayaat-e-bood-o-hast lage,

Farishte dekh rahe hain zameen o charkh ka rabt,
Ye faasla bhi to insaan ki ek jast lage,

Wahaan safeene ko pahuncha diya hai tufaan ne,
Har ek mauj-e-bala ab jahaan se past lage,

Tere hi ghum ne kisi samt dekhne na diya,
Ke ab hujoom-e-tamanna bhi tang-dast lage,

Jo teri bazm se 'Bekal' chala to hosh mein tha,
Ajeeb baat hai ab wo bhi mast mast lage.!!

"Bekal Utsahi"
__________

Hikayaat-e-bood-o-hast = stories of past & present,
Tang-dast = stingy, limited means,