To Pahle Mera Hi Haal-e-tabah Likh Lijiye

To pahle mera hi haal-e-tabah likh lijiye,
Phir apne aap ko aalam panah likh lijiye,

Kitaab-e-sahra mein zikr aaye jab samandar ka,
Meri hayat kisi ki nigah likh lijiye,

Diyon ke qatl pe suraj ki har kiran chup hai,
Is ahtiyaat ko jashn-e-siyah likh lijiye,

Labo'n pe amn ke naghme dilon mein jang ki aag,
Shikast-e-azm ba-naam-e-sipah likh lijiye,

Wo mere qatl ka mulzim hai log kahte hain,
Wo chhut sake to mujhe bhi gawah likh lijiye,

Main apne ghar ki tabahi sambhaal lunga magar,
Zamane bhar ka mujhe sarbarah likh lijiye,

Khataa'en itni hain 'Bekal' mujhe nahin maloom,
Yahi saza hai mera har gunah likh lijiye.!!

"Bekal Utsahi"
__________

Shikast-e-azm = defeat of determination,
Ba-naam-e-sipah = in the name of soldiers,
Sarbarah = a manager, an agent,