Mohtaaj hum-safar ki masaafat na thi meri,
Sab saath the kisi se rafaaqat na thi meri,
Haq kis se maangta ke makeeno'n ke saath saath,
Deewar-o-baam-o-dar ko zaroorat na thi meri,
Sach bol ke bhi dekh liya un ke saamne,
Lekin unhein pasand sadaqat na thi meri,
Main jin pe mar mita tha wo kaaghaz ke phool the,
Rasmi mukaalme the mohabbat na thi meri,
Jo dusron ke dukh the wahi mere dukh bhi the,
Kuchh aisi mukhtalif bhi hikaayat na thi meri,
Bas kuchh usool the jo ba-har-haal the azeez,
Jaanam kisi se warna adaawat na thi meri..!!
"Aitebaar Sajid"
No comments:
Post a Comment