Meri rooh mein jo utar sakein wo mohabbatein mujhe chahiyen,
Jo saraab hon na azaab hon wo rifaqatein mujhe chahiyen,
Unhin saa'aton ki talash hai jo calendaro'n se utar gayin,
Jo samay ke saath guzar gayin wahi fursatein mujhe chahiyen,
Kahin mil sakein to samet la mare roz o shab ki kahaniyan,
Jo ghubaar-e-waqt mein chhup gayin wo hikayatein mujhe chahiyen,
Jo meri shabo'n ke charagh the jo meri ummeed ke baagh the,
Wahi log hain meri aarzu wahi suratein mujhe chahiyen,
Teri qurbatein nahin chahiyen mari shaairi ke mizaaj ko,
Mujhe faaslon se dawaam de tari furqatein mujhe chahiyen,
Mujhe aur kuchh nahin chahiye ye duaaen hain mere saayebaan,
Kadi dhoop mein kahin mil sakein to yahi chhatein mujhe chahiyen..!!
"Aitebaar Sajid"
No comments:
Post a Comment