Mera hai kaun dushman meri chahat kaun rakhta hai,
Isi par sochte rahne ki fursat kaun rakhta hai,
Makeenon ke taalluq hi se yaad aati hai har basti,
Wagarna sirf baam-o-dar se ulfat kaun rakhta hai,
Nahin hai nirkh koi mere in ash'aar-e-taaza ka,
Ye mere khwaab hain khwaabon ki qeemat kaun rakhta hai,
Dar-e-khema khula rakkha hai gul kar ke diya hum ne,
So izn-e-aam hai lo shauq-e-ruKHsat kaun rakhta hai,
Mere dushman ka qad is bheed mein mujh se to ooncha ho,
Yahi mein dhundhta hun aisi qaamat kaun rakhta hai,
Humare shahar ki raunaq hai kuchh mashhoor logon se,
Magar sab jaante hain kaisi shohrat kaun rakhta hai..!!
"Aitebaar Sajid"
___
Nirkh = rate, price, cost,
Izn-e-aam = general permission,
No comments:
Post a Comment