Khairaat Sirf Itni Mili Hai Hayat Se

Khairaat sirf itni mili hai hayat se,
Paani ki boond jaise ata ho furaat se,

Shabnam isi junoon mein azal se hai seena-koob,
Khursheed kis maqaam pe milta hai raat se,

Nagaqh ishq waqt se aage nikal gaya,
Andaza kar rahi hai khirad waqiaat se,

Su-e-adab na thehre to dein koi mashwara,
Hum mutmaeen nahin hain teri kaainat se,

Saakit rahein to hum hi theharte hain ba-qusoor,
Bolein to baat badhti hai chhoti si baat se,

Aasan-pasandiyon se ijaazat talab karo,
Rasta bhara hua hai 'Adam' mushkilaat se.!!

"Abdul Hameed Adam"
__________

Seena-koob = chest-beating,
Nagaah = accidentally, suddenly,
Su-e-adab = insolence, rudeness,
Saakit = at rest, static,