Ke Jaise Kunj-e-chaman Se Saba Nikalti Hai

Ke jaise kunj-e-chaman se saba nikalti hai,
Tere liye mere dil se dua nikalti hai..

Qadam badhaun teri rahguzaar hai aakhir,
Magar ye raah kahin aur ja nikalti hai..

Yahin kahin pe hai rasta dawaam-e-wasl ka bhi,
Yahin kahin se hi raah-e-fana nikalti hai..

Zaroor hota hai ranj-e-safar masafat mein,
Ke jaise chalne se aawaz-e-pa nikalti hai..

Yahaan wahaan kisi chehre mein dhundhte hain tumhein,
Humare milne ki surat bhi kya nikalti hai.. 

Har ek aankh mein hoti hai muntazir koi aankh,
Har ek dil mein kahin kuchh jagah nikalti hai..

Jo ho sake to suno zakhma-e-khamoshi ko,
Ke us se khoye huon ki sada nikalti hai..

Hum apni rah pakadte hain dekhte bhi nahin,
Ke kis dagar pe ye khalq-e-khuda nikalti hai.!!

"Abrar Ahmad"
__________

Kunj-e-chaman = groove of garden,
Dawaam-e-wasl = eternity to union,
Zakhma-e-khamoshi = plectrum, pluck of silence,
Khalq-e-khuda = creation of God,