Hum Ne Rakkha Tha Jise Apni Kahani Mein Kahin

Hum ne rakkha tha jise apni kahani mein kahin,
Ab wo tahreer hai auraq-e-khizani mein kahin..

Bas ye ek sa'at-e-hijraan hai ke jaati hi nahin,
Koi thehra bhi hai is aalam-e-faani mein kahin..

Jitna samaan bhi ikattha kiya is ghar ke liye,
Bhool jayenge use naql-e-makaani mein kahin,

Khair auron ka to kya zikr ke ab lagta hai,
Tu bhi shaamil hai mere ranj-e-zamaani mein kahin..

Chashm-e-namnaak ko is darja haqarat se na dekh,
Tujh ko mil jaana hai ek din isi paani mein kahin..

Markaz-e-jaan to wahi tu hai magar tere siwa,
Log hain aur bhi is yaad puraani mein kahin..

Jashn-e-maatam bhi hai raunaq si tamashaai ko,
Koi naghma bhi hai is marsiya-khwani mein kahin..

Aaj ke din mein kisi aur hi din ki hai jhalak,
Shaam hai aur hi is shaam suhaani mein kahin..

Kya samajh aaye kisi ko mujhe maloom bhi hai,
Baat kar jaata hun main apni rawaani mein kahin.!!

"Abrar Ahmad"
__________

Auraq-e-khizani = pages of autumn,
Sa'at-e-hijraan = time during separation,
Aalam-e-faani = the perishable world, mortal world,
Naql-e-makaani = Migration,
Ranj-e-zamaani = sorrow of times,
Chashm-e-namnaak = wet eyes,
Hiqarat = humiliating,
Markaz-e-jaan = centre of life,
Marsiya-khwani = dirge singing,