Kashti chala raha hai magar kis ada ke saath,
Hum bhi na doob jaayen kahin nakhuda ke saath,
Dil ki talab padi hai to aaya hai yaad ab,
Wo to chala gaya tha kisi dilruba ke saath,
Jab se chali hai aadam o yazdaa'n ki dastaan,
Har ba-wafa ka rabt hai ek bewafa ke saath,
Mehman mezbaan hi ko bahka ke le uda,
Khushbu-e-gul bhi ghoom rahi hai saba ke saath,
Peer-e-mugha'n se hum ko koi bair to nahin,
Thoda sa ikhtilaaf hai mard-e-khuda ke saath,
Shaikh aur bahisht kitne ta'ajjub ki baat hai,
Ya-rab ye zulm khuld ki aab-o-hawa ke saath,
Padhta namaaz main bhi hun par ittifaaq se,
Uthta hun nisf raat ko dil ki sada ke saath,
Mahshar ka khair kuchh bhi nateeja ho ai 'Adam',
Kuchh guftugu to khul ke karenge khuda ke saath.!!
"Abdul Hameed Adam"
__________
Nisf = the half, middle,
No comments:
Post a Comment