Jo Bhi Tere Faqeer Hote Hain

Jo bhi tere faqeer hote hain,
Aadmi be-nazeer hote hain..

Teri mahfil mein baithne waale,
Kitne raushan-zameer hote hain..

Phool daaman mein chand le lijiye,
Raaste mein faqeer hote hain..

Jo parinde ki aankh rakhte hain,
Sab se pahle aseer hote hain..

Dekhne waala ek nahin milta,
Aankh waale kaseer hote hain..

Jin ko daulat haqeer lagti hai,
Uff wo kitne ameer hote hain,

Jin ko qudrat ne husn bakhsha ho,
Qudratan kuchh shareer hote hain..

Hai khushi bhi ajeeb shay lekin,
Ghum bade dil-pazeer hote hain..

Ai 'Adam' ahtiyaat logon se,
Log munkir-nakeer hote hain..

"Abdul Hameed Adam"
__________
Be-nazeer = matchless, unique, peerless,
Kaseer = abundant, many, much,
Dil-pazeer = heart-pleasing,