Kahin Yaqeen Se Na Ho Jaayein Hum Gumaan Ki Tarah

Kahin yaqeen se na ho jaayein hum gumaan ki tarah,
Sambhaal kar humein rakhiye mata-e-jaan ki tarah..

Jise sadaf ki tarah aankh mein chhupaya tha,
Wo kho na jaaye kahin ashk-e-rayegaan ki tarah,

Humein bhi khauf-e-talaatum ne gher rakha tha,
Khula nahin tha abhi wo bhi baadbaan ki tarah,

Nisaab-e-ishq mein saare sawaal mushkil the,
Mohabbatein bhi thin darpesh imtihaan ki tarah..

Khule jo lab to unhin aainon mein hairat thi,
Jo dekhte the humein aks-e-be-zabaan ki tarah,

Jahaan mili thin kabhi khushbuein hawaon se,
Mahak raha tha wo jangal bhi gulistaan ki tarah,

Hunar-wari hai humari ki apne khwabon se,
Qafas bhi hum ne sajaya tha aashiyaan ki tarah.!!

"Farah Iqbal"
__________

Mata-e-jaan = commodity of heart,
Sadaf = a shell, a mother of pearl,
Khauf-e-talaatum = fear of storm,
Baadbaan = sail,
Nisaab-e-ishq = text book of love,
Darpesh = placed before, under consideration,
Hunar-wari = Having Skill,