Kaise Manzar Hain Jo Idraak Mein Aa Jaate Hain

Kaise manzar hain jo idraak mein aa jaate hain,
Jaise moti kisi poshaak mein aa jaate hain..

Main jhatakti hun sabhi zehn se ye wahm-o-gumaan,
Phir bhi aksar ye meri tak mein aa jaate hain,

Jaisa bheja hai mujhe aap ne paighaam-e-wafa,
Aise naame to kai daak mein aa jaate hain..

Apni hasti pe gumaan itna na kijiye saahab,
Paikar-e-khaak to phir khaak mein aa jaate hain..

Jin ko aankhon mein basane ki ijaazat bhi nahin,
Wo tasawwur dil-e-bebaak mein aa jaate hain,

Nahin hote hain jo chehre se ayaa'n ranj-o-alam,
Wo sabhi seena-e-sad-chaak mein aa jaate hain.!!

"Farah Iqbal"
__________

Idraak = perception, understanding, 
Paikar-e-khaak = form / embodiment / image of dust,
Seena-e-sad-chaak = a chest which has hundred cuts,