Hum Musafir Yunhi Masroof-e-safar Jayenge

Hum musafir yunhi masroof-e-safar jayenge,
Be-nishaan ho gaye jab shahar to ghar jayenge,

Kis qadar hoga yahaan mehr-o-wafa ka maatam,
Hum teri yaad se jis roz utar jayenge,

Jauhari band kiye jaate hain bazaar-e-sukhan,
Hum kise bechne almaas-o-gauhar jayenge,

Nemat-e-zeest ka ye qarz chukega kaise,
Laakh ghabra ke ye kahte rahein mar jayenge,

Shayad apna bhi koi bait hudi-khwa'n ban kar,
Saath jayega mere yaar jidhar jayenge,

'Faiz' aate hain raah-e-ishq mein jo sakht maqaam,
Aane waalon se kaho hum to guzar jayenge..!!

"Faiz Ahmad Faiz"
__________

Hudi-khwa'n = singers to make camel run, walk,