Ghum-e-duniya Ghum-e-hasti Ghum-e-ulfat Ghum-e-dil

Ghum-e-duniya, ghum-e-hasti, ghum-e-ulfat, ghum-e-dil, 
Kitne unwaan mile hain mere afsaane ko..

Phir se aa jayegi dekho tan-e-be-jaan mein jaan,
Aap aawaz to dijiye zara deewane ko..

Be-khudi mein bhi tera naam liye jaate hain,
Rog ye kaisa laga hai tere mastane ko..

Tujh se bas itni talab hai tere deewane ki,
Apne jalwon se saja de mere ghum-khane ko..

Shoala-e-dard-e-mohabbat koi bhadkaye to,
Hum to tayyaar hain is aag mein jal jaane ko..

Gar mera zauq-e-jabeen-saai salamat hai 'Fana',
Kaba ek roz bana dunga sanam-khane ko.!!

"Fana Bulandshahri"
___________

Zauq-e-jabeen-saai = taste for praying, bowing head,