Ek Muddat Se Yahaan Thehra Hua Paani Hai

Ek muddat se yahaan thehra hua paani hai,
Dasht-e-tanhaai hai aur aankh mein veeraani hai..

Dekho khamosh si jheelon ke kinaare ab bhi,
Sog mein lipte darakhton ki farawaani hai..

Aaina dekhne ki taab kahaan thi mujh mein,
Saaf likkhi thi jo chehre pe pashemani hai..

Dasht-e-wahshat mein charaghon ko jalaaun kaise,
In charaghon se hawaon ko pareshani hai..

Saaya-e-abr-e-tawajjoh ki khabar kya hoti,
Zindagi main ne to sahraon se pahchaani hai..

Apne maazi ko mujhe dafn bhi khud karna hai,
Ye qayamat bhi dil-o-jaan pe abhi dhhaani hai..

Ab ke chamka hai sitara jo 'Farah' bakht ka hai,
Tere atraaf usi ki hai jo tabaani hai.!!

"Farah Iqbal"
__________

Farawaani = abundance, plenty,
Atraaf = sides, directions, suburbs, around,
Tabaani = brightness,