Dekha Palat Ke Jab Bhi To Phaila Ghubaar Tha

Dekha palat ke jab bhi to phaila ghubaar tha,
Kuchh aansuon ki dhund thi ujda dayaar tha..

Yaadon ke aaine mein hain ab bhi basi hui,
Aankhein ke jin mein munjamid ek intizaar tha..

Rishton ki dor haath se chhooti thi is liye,
Daaman jo bad-gumaniyon se taar taar tha..

Kaisi thi may jo aankh se tu ne pilaai thi,
Meri rago'n mein aaj tak us ka khumaar tha..

Toota koi sitara tha ya khwab-e-aarzu,
Taair qafas mein raat bahut be-qaraar tha..

Dhundla diye the jis ne sabhi aaine yahaan,
Mere hi ghar se uttha wo gard-o-ghubaar tha.!!

"Farah Iqbal"
__________

Munjamid = frozen, congealed, solid,