Donon Jahaan Teri Mohabbat Mein Haar Ke

Donon jahaan teri mohabbat mein haar ke,
Wo ja raha hai koi shab-e-ghum guzaar ke..

Viraan hai may-kada khum-o-saaghar udaas hain,
Tum kya gaye ke rooth gaye din bahaar ke..

Ek fursat-e-gunaah mili wo bhi chaar din,
Dekhe hain hum ne hausle parwardigaar ke..

Duniya ne teri yaad se begaana kar diya,
Tujh se bhi dil-fareb hain ghum rozgaar ke..

Bhoole se muskura to diye the wo aaj 'Faiz',
Mat poochh walwale dil-e-na-karda-kaar ke.!!

"Faiz Ahmad Faiz"
__________

Dil-e-na-karda-kaar = heart whose efforts are futile,