Dil Ko Mita Ke Daagh-e-tamanna Diya Mujhe

Dil ko mita ke daagh-e-tamanna diya mujhe,
Ai ishq teri khair ho ye kya diya mujhe,

Mahshar mein baat bhi na zabaan se nikal saki,
Kya jhuk ke us nigaah ne samjha diya mujhe,

Main aur aarzu-e-wisaal-e-pari-rukhaan,
Is ishq-e-sada-lauh ne bahka diya mujhe,

Har baar yaas hijr mein dil ki hui shareek,
Har martaba ummeed ne dhoka diya mujhe,

Allah re tegh-e-ishq ki barham-mazahiyaan,
Mere hi khoon-e-shauq mein nahla diya mujhe,

Khush hun ki husn-e-yaar ne khud apne haath se,
Ek dil-fareb daagh-e-tamanna diya mujhe,

Duniya se kho chuka hai mera josh-e-intizaar,
Aawaz-e-pa-e-yaar ne chaunka diya mujhe,

Daawa kiya tha zabt-e-mohabbat ka ai 'Jigar',
Zaalim ne baat baat pe tadpa diya mujhe..!!

"Jigar Muradabadi"
___
Aarzu-e-wisaal-e-pari-rukhaan = desire of union with fairy-faced,
Ishq-e-sada-lauh = simple-nature d love,
Yaas = Despair, desperation, hopelessness,
Barham-mazahiyaan = angry ridicule, humour,