Dil Ko Sukoon Rooh Ko Aaraam Aa Gaya

Dil ko sukoon rooh ko aaraam aa gaya,
Maut aa gayi ke dost ka paighaam aa gaya,

Jab koi zikr-e-gardish-e-ayyaam aa gaya,
Be-ikhtiyaar lab pe tera naam aa gaya,

Ghum mein bhi hai suroor wo hangaam aa gaya,
Shayad ki daur-e-baada-e-gulfaam aa gaya,

Deewangi ho aql ho ummeed ho ke yaas,
Apna wahi hai waqt pe jo kaam aa gaya,

Dil ke muaamlaat mein naaseh shikast kya,
Sau baar husn par bhi ye ilzaam aa gaya,

Sayyaad shadmaan hai magar ye to soch le,
Main aa gaya ke saaya tah-e-daam aa gaya,

Dil ko na poochh marka-e-husn-o-ishq mein,
Kya jaaniye ghareeb kahaan kaam aa gaya,

Ye kya maqaam-e-ishq hai zaalim ke in dinon,
Aksar tere baghair bhi aaraam aa gaya,

Ahbab mujh se qat-e-talluq karein 'Jigar',
Ab aaftab-e-zeest lab-e-baam aa gaya..!!

"Jigar Muradabadi"