Dil Ki Taraf Hijaab-e-takalluf Utha Ke Dekh

Dil ki taraf hijaab-e-takalluf utha ke dekh,
Aaina dekh aur zara muskura ke dekh..

Is daur mein ye tarz-e-jafa aazma ke dekh,
Dil ke bajaaye dil ke sukoon ko mita ke dekh..

Tasleem ki nazar se karishme raza ke dekh,
Begaangi-e-dost ko apna bana ke dekh..

Is shorish-e-hayat ko had se badha ke dekh,
Ye fitna aur hashr se pahle utha ke dekh..

Yun dekhta hai teergi-e-aab-o-gil mein kya,
Sholon se khel dil ko jala aur jala ke dekh..

Har zindagi ka naam na rakh dil ki zindagi,
Imaan zindagi pe na la aazma ke dekh..

Teri tajalliyon se kisi tarah kam nahin,
Dil ki tajalliyon ko kabhi dil mein aa ke dekh..

Ab ke ada-e-khaas se kar imtihaan-e-dil,
Jo barq toor par na giri ho gira ke dekh..

Haan ahl-e-dil ke haal se ghaflat muhaal hai,
Achchha yaqeen nahin to mujhi ko bhula ke dekh..

Duniya ko dekhna to mayassar nahin tujhe,
Zarre ko dekhna hai to duniya bana ke dekh..

'Faani' safeena ab bhi na doobe to kya kare,
Tufana ko na dekh sitam nakhuda ke dekh.!!

"Faani Badayuni"
__________

Tarz-e-jafa = manner of infidelity,
Tasleem = saluting most respectfully, homage, obeisance, greeting,
Raza = desire, willingness, will, wish,
Shorish-e-hayat = tumult of life,
Teergi-e-aab-o-gil = dullness, opacity, darkness, turbidity of water and soil, earth,
Tajalliyon = lightenings,
Ghaflat = carelessness, negligence,