Ada Se Aarh Mein Khanjar Ke Munh Chhupaye Hue

Ada se aarh mein khanjar ke munh chhupaye hue,
Meri qaza ko wo laaye dulhan banaye hue..

Ilaahi kyun nahin hoti koi bala naazil,
Asar hai der se dast-e-dua uthaye hue..

Teri lagaai hui aag hashr tak na bujhi,
Hue na mar ke bhi thande tere jalaye hue.. 

Bala-e-jaan hai magar phir bhi aarzu hai teri,
Hum us ko apne kaleje se hain lagaye hue..

Sahar hui ke wo yaadash-ba-khair aata hai,
Charagh hain meri turbat ke jhilmilaye hue..

Tumhin kaho ke tumhein apna samajh ke kya paaya,
Magar yahi ke jo apne the sab paraye hue..

Kisi ka haye wo maqtal mein is tarah aana,
Nazar bachaye hue aasteen chadhaye hue..

Ajal ko muzhda-e-fursat ki aaj 'Faani'-e-zaar,
Ummid-e-wasl se baitha hai lau lagaye hue.!!

"Faani Badayuni"
__________

Yaadash-ba-khair = good rememberance, May he be in peace,
Muzhda-e-fursat = good news of leisure,