Dil Jins-e-mohabbat Ka Kharidaar Nahin Hai

Dil jins-e-mohabbat ka kharidaar nahin hai,
Pahli si wo ab surat-bazaar nahin hai,

Har baar wahi soch wahi zahar ka saaghar,
Is par ye sitam-e-jur'at-e-inkaar nahin hai,

Kuchh uth ke bagulon ki tarah ho gaye raqsaa'n,
Kuchh kahte rahe raasta hamwaar nahin hai,

Dil doob gaya lazzat-e-aghosh-e-sahar mein,
Bedaar hai is tarah ki bedaar nahin hai,

Hum is se mata-e-dil-o-jaan maang rahe hain,
Jo ek tabassum ka rawadaar nahin hai,

Ye sar se nikalti hui logon ki faseelein,
Dil se magar oonchi koi deewar nahin hai,

Dam saadh ke baitha hun agarche mere sar par,
Ek shaakh-e-samar-daar hai talwaar nahin hai,

Dam lo na kahin dhoop mein chalte raho 'Baqi',
Apne liye ye saaya-e-ashjaar nahin hai.!!

"Baqi Siddiqui"
__________

Jins-e-mohabbat = wares of love,
Rawadaar = tolerant, indulgent,