Dard Ka Samandar Tha Sirf Paar Hone Tak

Dard ka samandar hai sirf paar hone tak,
Ishq ki haqeeqat ke aashkaar hone tak..

Roz-o-shab ki gardish mein mahw-e-raqs rahte hain,
Khaak ke bagule hain bas ghubaar hone tak..

Khwahishon ki khushbu mein khwab khwab phirte the,
Paalki mein taaron ki hum sawaar hone tak..

Qurbaton ke jangal mein der kitni lagti hai,
Pairahan mohabbat ka taar taar hone tak..

Soch ki haweli mein ek sukoot taari tha,
Muntazir nigaahon ke be-qaraar hone tak..

Aatish-e-ghum-e-dil mein khaak ho gaye hum to,
Rishta-e-mohabbat ke ustuwaar hone tak..

Zindagi ke lahje ko ek umr lagti hai,
Dhoop ki tamazat se saya-daar hone tak..

Ajnabi musafir the hum-safar rahe phir bhi,
Ek gurez haail tha aitibaar hone tak..

Paaniyon ke seene par aaj bhi safeene hain,
Sar-phiri hawaon ke sazgaar hone tak..

Kitni maujein doobengi saahilon ke daaman mein,
Qurbaton ki koshish mein raaz-daar hone tak..

Tha kamaal-e-kuzagar Dhhaalta raha mujh ko,
Haan 'Farah' lage barson shahkaar hone tak.!!

"Farah Iqbal"
__________

Ustuwaar = firm, strong,
Tamazat = intense heat,
Sazgaar = favourable, agreeing,